ክቡር አቶ ገዱ የዓለም ምግብ ድርጅት ዋና ስራ አስፈጻሚን በጽ/ቤታቸው ተቀብለው አነጋገሩ

 

የኢፌዲሪ የውጭ ጉዳይ ሚኒስትር ክቡር አቶ ገዱ አንዳርጋቸው የዓለም ምግብ ድርጅት ዋና ስራ አስፈጻሚ የሆኑትን ክቡር ዴቪድ ቢስሊይን ዛሬ ግንቦት 19 ቀን 2012 ዓም በጽ/ቤታቸው ተቀብለው አነጋግረዋል።

ሁለቱ ወገኖች የኮሮና ቫይረስ ስርጭትን ለመግታት፣ የበረሃ አንበጣ እና የጎርፍ አዳጋ በቀጠናው ላይ እያደረሰ ያለውን ጉዳት ለመከላከል በትብብር መስራት በሚቻልባቸው ጉዳዮች ዙሪያ መክረዋል። በተጨማሪም ስለታላቁ የህዳሴ ግድብ ግንባታ በተመለከተ መረጃ ተለዋውጠዋል።

ክቡር አቶ ገዱ የዓለም ምግብ ድርጅት ለኢትዮጵያ እያደረገ ያለውን ድጋፍ አድንቀው፤ ኢትዮጵያ ከድርጅቱ ጋር ያላትን ትብብር አጠናክራ እንደምትቀጥል ገልጸዋል። በኮሮና ቫይረስ ምክንያት በዓለም ላይ እየደረሰ ባለው የሰው ሞት የተማቸውን ሃዘን ገልጸዋል። በኢትዮጵያ የኮሮና ቫይረስ ያለበትን ደረጃ እና ኢትዮጵያ ወረርሽኙን ለመግታት እያከናወነች ያለውን ስራ በተመለከተ ገለጻ አድርገዋል። የበረሃ አንበጣና የጎርፍ አደጋ በኢትዮጵያ እና በጎረቤት አገሮች እያደረሰ ያለውን ጉዳት በተመለከተም ማብራሪያ ሰጥተዋል። የአፍሪካ ቀንድ ቀጠና ከምንጊዜውም በላይ የዓለም አቀፉን ማህበረሰብ ድጋፍ በእጅጉ እንደሚፈልግና የዓለም የምግብ ድርጅት እያደረገ ያለውን ድጋፍ በተሻለ አጠናከሮ እንዲቀጥል ክቡር አቶ ገዱ በዚህ ወቅት ጥሪ አቅርበዋል።

ክቡር አቶ ገዱ የታላቁ የኢትዮጵያ ህዳሴ ግድብ ግንበታ የደረሰበትን ደረጃና በአትዮጵያ፣ በሱዳንና በግብጽ መካከል ሲደረጉ የቆዩ ውይይቶችን በተመለከተ ገለጻ አድርገዋል። ዓለም አቀፉ ማህበረሰብ ሶስቱ አገሮች ያላቸውን ልዩነት በውይይትና በድርድር እንዲፈቱ ድጋፍ እንዲያደርግም ክቡር አቶ ገዱ ጠይቀዋል።

የዓለም ምግብ ድርጅት ዋና ስራ አስፈጻሚ ክቡር ዴቪድ ቢስሊይን በበኩላቸው ድርጅታቸው ከኢትዮጵያ ጋር ያለውን ትብብር አጠናክሮ እንደሚቀጥል ገልጸዋል። ኢትዮጵያ የኮሮና ቫይረስን፣ የበረሃ አንበጣንና የጎርፍ አደጋን ለመከላከል እያደረገች ያለውን እንቅስቃሴም አድንቀዋል። የኮሮና ቫይረስ ወረርሽኝ የዓለም ስጋት በመሆኑ የሁሉም አካላት ትብብር ወሳኝ መሆኑን ክቡር ዴቪድ ገልጸዋል። ከታላቁ የህዳሴ ግድብ ግንባታ ጋር በተያያዘ ሶስቱ አገሮች ልዩነታቸውን በውይይት መፍታት አለባቸው ብለው እንደሚያምኑም ገልጸዋል።

Image may contain: 1 person, sitting and indoor
Image may contain: one or more people and suit
Image may contain: one or more people, people sitting, table and indoor
Image may contain: one or more people and suit
Posted in News.

Leave a Reply

Your email address will not be published. Required fields are marked *